Hikayat Tsunami

ACEH MEUGONCANG
by sudirman
Alhamdulillah Tuhan lon pujoe
Nyan peujeud bumoe alam semesta
Nyan peujeud laot dengon daratan
Asoe di dalam memacam rupa
Neubri ya Allah seuhat pikeran
Beu-ek lon karang saboh calitra
Kadang cit jeud saboh peudoman
Contoh teuladan bak manosia
Jinoe lon kisah saboh riwayat
Kisah baroe tat di Aceh Raya
Aceh meugoncang judol ulon bie
Ban lheuh teuka ie ngon gempa raya

Han ek tapike karonya Tuhan
Nyo kenyataan katroh ta rasa
Tanggai dua ploh nam bak jeum poh lapan
Aceh megoncang gempa tat raya,
Watee kajijak jeum ka poh lapan
Ka meuri goyang sang aras donya
Hingga bala troh kuasa Tuhan
Bumoe neugoyang neupeutron geumpa.

Ureung meurateb inong ngon agam
Ulee ka mumang dum manosia
Mandum teupike peu keujadian
Nyan hantroh tapham le manosia

han pre meungucap mandum bak babah
geuseubot Allah teumakot raya
meunan keuh kisah nibak uroe nyan
lam kejadian musibah raya

hana padup trep oh lheuh gempa nyan
teuka gelombang nyan cukop raya
Ie laot di-ek wahe rakan droe
meutalo-talo oh lheuh ban geumpa
lee tat manosia peuseulamat droe
bek roh jitampo lee bakat raya.
Ladum bak geuplung tan ija pinggang
Ladum katinggai aneuk dengon ma
Nacit bak kayee ladum geumumat
Pue ka kiamaaat he…ya Rabbanaaa
Bandum uroe nyan peusiblah untong
Megulong-gulong dalam ie raya
Hareuta ngon nyawong habeh dum jiron
Keu deh jisintong u laot jiba
Ie laot di ek lagee ban awan
Nanyum bak sang-sang kiamat donya
Lam siklep mata digisa ie nyan
Allahuakbar mayet meukeuba
Kaom geutanyoe ramee tat leupah
Keunong musibah dalam ie raya
Rumoh dum luroh geudong ka beukah
Hilee ngon darah di Aceh Raya.

Ladum gadoh ma ladum gadoh yah
Ladum meutuah saboh tan lee na
Ladum ureung cik geuwoe bak Allah
Aneuk tat mirah tinggai di donya

Meunan keuh bagoe nibak uroe nyan
ulee ka mumang dum manusia
saree watee nyan geu mehoi Tuhan
jaroe meugawang dalam ie raya
rayek ngon ubit lee tat nyan karam
inong ngon agam hana meuhoka
bacut drat donya Allah neugoyang
nanggroe rab sikan habeh seureupa

*****

Sidumnan teuga meunimpa alam
Putoh hubongan kayee dum bungka
Mayet meugule bak taloe jalan
Allah cok pulang nyanka geucepta

Aleran lestrek pih matee total
Telepon hai rakan hana beurita
Dakna syedara keumeungjak keunan
Hana hubongan rot jalan raya

Dari Meulaboh putoh hubongan
Di sinan korban ramee lagoina
Meurebee matee di kota Calang
Lamno hai rakan han ek takira

Di Banda Aceh pih lee tat korban
Seubab di sinan cit pusat kota
Tangieng di Lhoknga pih cukop gawat
Kapai meujungkat u be be raya

Cukop lee matee nyawong meulayang
Padumna korban ta-eu beurita
Bak beurita TV sabee disiar
Uroe ngon malam han reuda-reuda
Rata jeud sagoe mayet meuriti
Bala Tuhan bri keu Aceh Raya
Ka padum uroe mayet dalam ie
Tansoe paduli dum manusia
Dak na padum droe seulamat bak ie
Seutot fameli dengon syedara
Seubab barokon hantom teurjadi
Bak ta-eu dali si umue masa

dari Meulaboh ka troeh u Pidie
ureung muengungsi eh di yub tenda
cukop meukarat para pengungsi
kresis dengon ie makanan hana

Surya Paloh hancu tat hatee
Watee geupike keu nasib bangsa
Digobnyan dak jeud sigra beuhase
Peusapat mayet dum manusia
Hareuta habeh hana geupike
Geutanggong sabee dum sukarela
Dak na nyang udep bek sampoe matee
Lee tat geulangse makanan geuba
Ngon reah reoh para relawan
Kuburan masal sigra geubuka
Peusapat mayet dum taloe jalan
Pasoe lam uruk hana boeh kafan
Inong ngon agam hana keurenda
Meutindeh lapeh mayet di sinan
Dengon kenderaan keunan troh jiba
Nyan ladum uroh para pengungsi
Kadek bu jibi saket peureksa
Meu macam ubat kana jisinan
Beureukat bantuan dalam ngon lua
Beumurah hate ureung nyang leubeh
Rakyat meu preh-preh bantoan neuba
Beu lagee janji bek hek kamoe preh
Di rakyat Aceh manoe ie mata

Uroe keu uroe meunganto malam
Rab meuri normal di Kota Banda
Seulamat tuboh para relawan
Seumoga Tuhan neubalah jasa
*******
Nyoe saboh tanda donya ka akhee
Beuna tapikee bandum syedara
Sidroe dua droe nyang puebut jahee
Bandum teuh sare tarasa bala
Nibak buet salah bek roh gisalee
Bak buet-buet jahe bek lee tagisa
Beujeud keu seujarah kisah Meulaboh
Umat neu sampoh ateuh rung donya
Meureubee nyawong ka geucok pulang
Aceh lon sayang katoe ie mata

Keu rakyat Aceh geubri cobaan
Supaya sadar umat lam donya
Sidum nan bala meuhan sadar lee
Tapreh boh hatee geulungkop donya


Doa geutanyoe waheee ee… rakan
Keu ureung karam dalam ie raya
Neubri keuh beujroh tempat ureung nyan
Bak saboh taman asoe syeruga


Wahee rakan lon nyang tat meutuah
Nyan na musibah dalam ie raya
Beu rayeuk saba hate beutabah
Cobaan Allah lagee nyoe rupa
Meunyoe na amai ngon kebajikan
Meurumpok teuma di padang masya
Seubab geutanyoe peunejeud Tuhan
Mandum hee rakan keunan tagisa.

*******
Neubri ya Rabbi neubri ya Allah
Ureung musibah asoe syeruga
Beuneuterimong amai nyang saleh
Neubri bek teupeh apui neuraka.

Boh pisang manok mameh han sakri
Boh pisang idi lepi lam dada
Mangat on ubi tapeugot urap
Mangat pisang krat tacroh keu bada

Meunyoe na salah haba lon karang
Maklom hai rakan gohlom beasa
Jioh deungon to saleum lon intat
Kadang cit mangat jeud keupeunawa

Banda Aceh, Juni 2005

*******(SudirMan)*********